ఫ్యామిలీతో హాయిగా ఈ సినిమా చూడొచ్చు

‘ఛాంగురే బంగారు రాజా’ హోల్‌సమ్‌ ఫ్యామిలీ ఎంటర్‌టైనర్‌. కామెడీ, థ్రిల్‌, యాక్షన్‌ అన్నీ ఉంటాయి. ఎలాంటి ఇబ్బంది లేకుండా ఫ్యామిలీతో హాయిగా చూడొచ్చు. మిమ్మల్ని బాగా నవ్వించే చిత్రం ఇది’ అన్నారు హీరో కార్తిక్‌ రత్నం. హీరో రవితేజ నిర్మాణంలో కార్తిక్‌ రత్నం హీరోగా నటించిన ‘ఛాంగురే బంగారురాజా’ చిత్రం ఈ నెల 15న విడుదల కానుంది. ఈ సందర్భంగా మంగళవారం ఆయన విలేకరుల సమావేశంలో చిత్ర విశేషాలు పంచుకున్నారు.

రంగురాళ్ల నేపథ్యంలో

కొన్ని కొండ ప్రాంతాల్లో రంగురాళ్లు దొరుకుతాయి. అయితే అవి నిషిద్ధ ప్రాంతాలు. కానీ కొందరు రిస్క్‌ చేసి రంగురాళ్ల కోసం తవ్వకాలు చేస్తుంటారు. ఆ నేపథ్యంలోనే మా సినిమా కథ ఉంటుంది. ఇందులో నాలుగు గ్యాంగులు ఉంటాయి. దాదాపు సినిమా అంతా ఈ గ్యాంగుల ఛేజింగ్‌ ఉంటుంది. ‘నారప్ప’ చిత్రానికి సతీశ్‌ అసోసియేట్‌ డైరెక్టర్‌గా పని చేశారు. ఇద్దరం ఓ రెండు నెలలు క్లోజ్‌గా ప్రయాణించాం. అప్పుడే ఈ చిత్రకథ చెప్పారాయన. రవితేజగారు ఆ కథను తీయడానికి ముందుకు వచ్చారని తెలిసి ఎంతో ఆనందంతో గంతులు వేశాను.

పదేళ్లు అయింది

రంగస్థలం నుంచి పరిశ్రమకు వచ్చాను. చాలా ప్రదర్శనలు ఇచ్చాను. చిన్నప్పుడే మొదటి నాటకానికి నంది అవార్డ్‌ వచ్చింది. పరిశ్రమకు వచ్చి పదేళ్లు అయింది. పరిశ్రమలో రాణించాలనే వారికి రవితేజ, నాని వంటి వారు స్ఫూర్తి. అటువంటిది రవితేజ నిర్మించే చిత్రంలో నటించడం గొప్ప ఆనందాన్ని ఇచ్చింది. అలాగే దర్శకుడు సతీశ్‌ వర్మ రైటింగ్‌ చాలా బలంగా ఉంటుంది. అలాగే ఆన్‌స్పాట్‌ ఇంప్రవైజేషన్‌ కూడా బాగుంటుంది. ఈ సినిమాలో మెకానిక్‌ బంగార్రాజు పాత్ర పోషించాను. డబ్బులు ఇస్తేనే పని చేసే రకం. ఇంతకుముందు చేసిన సీరియస్‌ పాత్రల్లో మాడ్యులేషన్‌, డైలాగులు, లుక్‌, వాయిస్‌ అన్నీ సీరియస్‌గా ఉండేవి. కానీ ఇందులో మాత్రం నేను నిజజీవితంలో ఎలా ఉంటానో అలాంటి పాత్రే పోషించాను.