ఎన్టీఆర్‌ని పిలిచాం కానీ...

ఇటీవల ‘హాలీవుడ్‌ క్రిటిక్స్‌ అసోసియేషన్‌’ (హెచ్‌.సి.ఏ) అవార్డు వేడుకల్లో ‘ఆర్‌.ఆర్‌.ఆర్‌’ చిత్రం మెరిసిన సంగతి తెలిసిందే. ఏకంగా ఐదు అవార్డుల్ని సొంతం చేసుకొని, తెలుగు సినిమా సత్తా చాటింది. ఈ వేడుకకు రామ్‌చరణ్‌, రాజమౌళి, కీరవాణి, సింథిల్‌, కార్తికేయ హాజరయ్యారు. కానీ ఎన్టీఆర్‌ మాత్రం కనిపించలేదు. దీనిపై సోషల్‌ మీడియాలో పెద్ద ఎత్తున చర్చ జరుగుతోంది. ఎన్టీఆర్‌ని ఎందుకు ఆహ్వానించలేదంటూ అభిమానులు హెచ్‌.సి.ఏని ఉద్దేశిస్తూ ట్వీట్లు చేస్తున్నారు. దాంతో.. హెచ్‌.సి.ఏ స్పందించాల్సివచ్చింది. ఈ మేరకు ఈ సంస్థ ఓ ట్వీట్‌ చేస్తూ ‘‘మేం అవార్డు కార్యక్రమానికి ఎన్టీఆర్‌ని ఆహ్వానించాం. కానీ ఓ కొత్త సినిమా షూటింగ్‌ కారణంగా ఆయన ఈ వేడుకకు రాలేకపోయారు. ఈ విషయాన్ని ఆయన మాతో చెప్పారు. ఆయనకు మేం త్వరలోనే అవార్డు అందజేస్తాం’’ అంటూ వివరణ ఇచ్చింది.