వేసవికి సామజవరగమనా

డిస్ట్రిబ్యూటర్‌గా పరిశ్రమలో తొలి అడుగులు వేసి, సహ నిర్మాతగా సక్సెస్‌ చవిచూశారు రాజేశ్‌ దండా. హాస్య మూవీస్‌ బేనర్‌ స్థాపించి నిర్మాతగా మారిన ఆయన శ్రీవిష్ణు హీరోగా రామ్‌ అబ్బరాజు దర్శకత్వంలో ‘సామజవరగమన’ చిత్రాన్ని నిర్మిస్తున్నారు. ఈ సినిమా విడుదలకు సిద్ధమవుతున్న సందర్భంగా రాజేశ్‌ దండా మీడియాతో మాట్లాడుతూ... ‘సామజవరగమనా’ ఫ్యామిలీ ఎంటర్టైనర్‌. వేసవిలో విడుదల చేస్తున్నాం. శ్రీ విష్ణు ఇప్పటిదాకా ఈ తరహా చిత్రం చేయలేదు. ‘నువ్వు నాకు నచ్చావ్‌’, ‘నువ్వు లేక నేను లేను’ తరహాలో కామెడీ ఉంటుంది. సందీప్‌ కిషన్‌తో ‘ఊరుపేరు భైరవకోన’ అనే చిత్రాన్ని భారీస్థాయిలో నిర్మిస్తున్నాం. వి. ఐ ఆనంద్‌ దర్శకుడు. శ్రీవిష్ణు, నరేశ్‌తో సినిమాలు చేయబోతున్నాం. సాయిధరమ్‌తేజ్‌, నాంది దర్శకుడు విజయ్‌ కనకమేడలతో సినిమాలు చేయాలనేది నా కోరిక’ అన్నారు.