Pavan Kalyan : సినిమాను సినిమాలా చూద్దాం

‘‘సినిమా హీరోలు అంటే నాకు చాలా ఇష్టం, గౌరవం. ఎందుకంటే వాళ్లు ఎవ రినీ దోపిడీ చేయరు. వస్తువులు దొంగిలించరు. కష్టపడతారు. నిజాయితీగా పన్నులు కడతారు. పాలిటిక్స్‌ అక్కడ వదిలేద్దాం. సినిమాను సినిమాగా చూద్దాం’’ అని పవన్‌ కల్యాణ్‌ అన్నారు. తన మేనల్లుడు సాయితేజ్‌తో ఆయన కలసి నటించిన చిత్రం ‘బ్రో’. సముద్ర ఖని దర్శకుడు. టీజీ విశ్వ ప్రసాద్‌ నిర్మాత. ఈ నెల 28న విడుదలవుతోంది. ఆదివారం హైదరాబాద్‌లో ప్రీ రిలీజ్‌ ఈవెంట్‌ నిర్వహించారు. ఈ సందర్భంగా పవన్‌ కల్యాణ్‌ మాట్లాడుతూ ‘రాజకీయం అయినా, సినిమా అయినా ఏ ఒక్కరికీ సొంతం కాదు. ఒక కుటుంబంలో ఇంతమంది హీరోలు ఉండడం కొందరికి ఇబ్బందిగా ఉండొచ్చు. కానీ మేం అంతా గొడ్డుచాకిరి చేస్తాం. కష్టాలు, నష్టాలు భరిస్తాం. ఒక దిగువ మధ్య తరగతి కుటుంబం నుంచి వచ్చి, మేం సాధించామంటే మీ అందరూ సాధించగలరు. సినీ పరిశ్రమ మా ఒక్క కుటుంబానిది కాదు. నేను జూనియర్‌ ఎన్టీఆర్‌, రామ్‌చరణ్‌లా గొప్పగా డాన్స్‌లు చేయలేకపోవచ్చు. ప్రభాస్‌, రానాలా కొన్నేళ్లపాటు ఏకధాటిగా శ్రమించలేకపోవచ్చు. కానీ సినిమా హిట్టు విషయంలో మాత్రం కాంప్రమైజ్‌ కాను. త్రికరణ శుద్ధిగా పనిచేయడం వల్లే కోట్లమంది అభిమానం పొందాను. ‘బాహుబలి, ఆర్‌ఆర్‌ఆర్‌’ సినిమాలు చూసినప్పుడు వాటిని మించిన సినిమాలు చేయాలనిపిస్తుంది. నేను పూర్తిగా సినీరంగంలోనే ఉండి ఉంటే ఎలా ఉండేదో కానీ నాకు ఆ మైండ్‌సెట్‌ లేదు.

‘బ్రో’ సినిమా కన్నీరు పెట్టిస్తుంది. నవ్విస్తుంది. బాధిస్తుంది. గుండెల నిండా నవ్వుకుంటాం. నవ్వుతూ ఏడుస్తాం. త్రివిక్రమ్‌ సంస్కృతంలో మహా పండితుడు. ఆయన స్నేహితుడు అయినందుకు ఆనందంగా ఉంది. అభిమానులను మెప్పించే స్ర్కీన్‌ప్లే అందించారు. సముద్రఖని ఈ సినిమా కోసం తెలుగు చదవడం నేర్చుకున్నారు. ఇది తెలుగువాళ్లందరికీ కనువిప్పు కావాలి. వివేక్‌ కూచిబొట్ల, టీజీ విశ్వప్రసాద్‌ చురుగ్గా ఏర్పాట్లు చేయడం వల్లే సినిమా త్వరగా పూర్తయింది. రోడ్డుపైన ఎవరో ఇసుక పోస్తే తేజ్‌ పడిపోయాడు. మీకు తెలుసు కదా? రోడ్లు ఎలా ఉంటాయో. ఆ రోడ్లు గురించి కాదు నేను చెప్పేది. అబ్దుల్‌ అనే వ్యక్తి చేసిన సాయం వల్లే తేజ్‌ ఈ రోజు మన ముందున్నాడు. తమిళ పరిశ్రమ తమిళ వాళ్లకే అనే సంకుచిత మనస్తత్వం వదిలితే కోలీవుడ్‌ కూడా టాలీవుడ్‌లా అద్భుతాలు చేస్తుంది. బయటవాళ్లకు అవకాశమిస్తే ఎదుగుతాం’ అని సూచించారు. సాయితేజ్‌ మాట్లాడుతూ ‘నా గురువు, మావయ్య, బ్రో... అన్నీ కల్యాణ్‌ గారే. ‘మెయిన్‌ లీడ్‌గా చేయాలి’ అని మావయ్య అడిగితే నమ్మలేకపోయా. అభిమానులు కాలర్‌ ఎగరేసే సినిమా ఇది. ఈ సినిమా చేయడం నా అదృష్టం’ అన్నారు. ‘బాబాయితో సాయితేజ్‌ సినిమా చేస్తున్నాడగానే అసూయగా అనిపించింది. మేం అంతా ఎప్పుడూ కల్యాణ్‌ బాబాయి వెనుకే ఉంటాం’ అని వరుణ్‌ తేజ్‌ చెప్పారు. మావయ్య అభిమానుల్లో ఒకడిగా ఇక్కడకు వచ్చాను, ‘బ్రో’ బ్లాక్‌ బస్టర్‌ అవుతుంది అని వైష్ణవ్‌ తేజ్‌ అన్నారు. ‘అందరూ రేపు ఏమవుతుందో అనే ఓ భయంలో బతుకుతున్నారు. వర్తమానమే తప్ప భవిష్యత్‌ అనేది లేదు అని ‘బ్రో’ సినిమాలో చెప్పాం. 70 రోజుల పనిని పవన్‌ సార్‌ 20 రోజుల్లో పూర్తి చేశారు’ అని సముద్రఖని తెలిపారు. ‘ది గ్రేట్‌ పవన్‌ కల్యాణ్‌తో ఈ సినిమాలో ఒక చిన్న పాత్ర చేశాను. దైవాంశ సంభూతుడు పవన్‌. ఆయన విజయానికి అభిమానులు అన్ని విధాలా తోడ్పడాలి’ అని బ్రహ్మానందం కోరారు. ‘పవన్‌ కల్యాణ్‌ అభిమానులు కోరుకునే అన్ని హంగులు ఈ సినిమాలో ఉన్నాయి. ఆయన నట విశ్వరూపం చూపారు. మా బేనర్‌లో ఇది 25వ చిత్రం కావడం మా అదృష్టం’ అని టీజీ విశ్వప్రసాద్‌ చెప్పారు. ‘పవన్‌ కల్యాణ్‌ మంచి మనిషి. ఆయనతో పనిచేసే అవకాశం దక్కినందుకు ఆనందంగా ఉంది. సాయితేజ్‌ సింప్లిసిటీ ఆకట్టుకుంది’ అని కేతిక శర్మ తెలిపారు. ‘బ్రో’ సినిమా చేసిన టైమే నా కెరీర్‌లో బెస్ట్‌ టైమ్‌. సాయితేజ్‌తో మళ్లీ సినిమా చేయాలనుంది’ అని ప్రియా ప్రకాశ్‌ వారియర్‌ అన్నారు. ‘బ్రో’ లాంటి గొప్ప చిత్రంలో నటించడం ఆనందంగా ఉందని ఊర్వశీ రౌతేలా చెప్పారు.