నా కెరీర్‌లో గొప్ప సినిమా

విరాట్‌ కర్ణను హీరోగా పరిచయం చేస్తూ శ్రీకాంత్‌ అడ్డాల దర్శకత్వంలో మిర్యాల రవీందర్‌రెడ్డి నిర్మించిన ‘పెదకాపు 1’ చిత్రం ఈ నెల 29న విడుదల కానుంది. ఈ నేపథ్యంలో చిత్ర ఛాయాగ్రాహకుడు చోటా కె నాయుడు మీడియాతో ముచ్చటించారు

శ్రీకాంత్‌ అడ్డాల తొలి చిత్రం ‘కొత్త బంగారులోకం’ చిత్రంతో మా ఇద్దరి జర్నీ మొదలైంది. అప్పటినుంచి తను తీసే ప్రతి సినిమా కథ నాకు చెబుతాడు. కానీ డేట్స్‌ కుదరక కలసి సినిమాలు చేయలేదు. ఈ చిత్రకథ చెప్పి ‘ఇదొక డిఫరెంట్‌ ఫిల్మ్‌. ఎలాగైనా మీరు చేయాలి. అవసరమైతే మీ కోసం వెయిట్‌ చేస్తా’ అన్నాడు శ్రీకాంత్‌. నేను సరేనన్నా. శ్రీకాంత్‌ నాకు కె.విశ్వనాథ్‌గారిలా అనిపిస్తాడు. అయితే ‘నారప్ప’ తర్వాత ఒక కొత్త టాన్స్‌ఫర్మేషన్‌ వచ్చింది. ‘పెదకాపు 1’ కథ చెప్పినప్పుడు కూడా ఇప్పుడు ట్రైలర్‌లో ఏది చూశామో అంత ఇంటెన్స్‌గా చెప్పారు. ఈ సినిమాలో ఆయన నటుడిగా కూడా కనిపిస్తారు. తన నటనతో అందర్నీ ఆశ్చర్యపరుస్తారు

ఎలా తీశామో తర్వాత చెప్తా

ఈ సినిమా ట్రైలర్‌లో ఒక అమ్మాయి ఎండిపోయిన చెట్టుకు ఉరి వేసుకుని కనిపిస్తుంది. సినిమాలో ఆ సీన్‌ చాలా కీలకం. రెండు ఎకరాల పొలంలో ఆ సీన్‌ తీశాం. మొత్తం బురదతో ఉంటుంది. అక్కడ ఎండిపోయిన చెట్టు పెట్టడం పెద్ద టాస్క్‌. ఆ బురదలో క్రేన్‌లు కూడా పనిచేయవు. ఒక చెట్టుని మనుషులు మోయడం అసాధ్యం. మరి అక్కడ చెట్టు ఎలా పెట్టామనేది మీరు సినిమా చూశాక చెబుతా. అలాగే మునకల లంక అనే ఊళ్లో ఓ ఇంటిని ఎన్నుకుని షూటింగ్‌ చేశాం. వర్షం వస్తే ఆ ఇల్లు మునిగిపోతుంది. మేం షూటింగ్‌ చేస్తున్నప్పుడు అలాగే జరిగింది. దాని కోసం మూడు నెలలు వెయిట్‌ చేసి, నీళ్లు పోయాక మళ్లీ షూట్‌ చేశాం. 1983ల నాటి వాతావరణాన్ని క్రియేట్‌ చేయడానికి చాలా హార్డ్‌ వర్క్‌ చేశాం. నా కెరీర్‌లో గొప్పగా చెప్పుకొనే సినిమా ఇది.

నిర్మాత కథని అంతగా నమ్మారు

మరో నిర్మాత అయితే ఈ సినిమాను ఐదారు కోట్ల రూపాయలతో తీసేవారు. కానీ నా కంటే , శ్రీకాంత్‌ కంటే నిర్మాత రవీందర్‌ రెడ్డి కథను బలంగా నమ్మి రూ.30, 40 కోట్లు ఖర్చు పెట్టి నిర్మించారు. అలాగే విరాట్‌తో పని చేస్తున్పప్పుడు తను కొత్త అనే ఫీలింగ్‌ రాలేదు. అనుభవమున్న వాడిలా బాగా చేశాడు.