గురువులకు అంకితం

‘సినిమా బండి’ ఫేమ్‌ వికాశ్‌ వశిష్ట హీరోగా మోక్ష, కుషిత కళ్లపు హీరోయిన్లుగా నటిస్తున్న చిత్రం ‘నీతోనే నేను’. అంజిరామ్‌ దర్శకత్వంలో యం. సుధాకర్‌ రెడ్డి నిర్మిస్తున్నారు. ప్రస్తుతం చిత్రీకరణ జరుగుతోంది. ఉపాధ్యాయ దినోత్సవం సందర్భంగా ఈ చిత్రం నుంచి ‘గురుః బ్రహ్మ గురుః విష్ణు’ అంటూ సాగే లిరికల్‌ గీతాన్ని చిత్రబృందం విడుదల చేసింది. సుద్ధాల అశోక్‌తేజ్‌ రాయగా మనో ఆలపించారు. ఈ సందర్భంగా సుధాకర్‌రెడ్డి మాట్లాడుతూ ‘నేను ప్రభుత్వ ఉపాధ్యాయుడిగా పనిచేశాను. ఈ సినిమా కథ కూడా ఉపాఽధ్యాయ వృత్తి, విద్యావ్యవస్థ లోపాల ఆధారంగా తెరకెక్కించాం. త్వరలోనే సినిమాను విడుదల చేస్తాం’ అన్నారు. దర్శకుడు మాట్లాడుతూ ‘కార్తీక్‌ సంగీతం అద్భుతంగా ఉంటుంది. సినిమాలో మంచి సందేశం ఉంద’ని చెప్పారు.