పలానా అబ్బాయితో అమ్మాయి

‘కల్యాణ వైభోగమే’ చిత్రంతో వెండితెర మీద మ్యాజిక్‌ చేసిన నాగశౌర్య, మాళవిక నాయర్‌ మరోసారి జంటగా నటించిన చిత్రం ‘పలనా అబ్బాయి.. పలానా అమ్మాయు’. ఈ ఫీల్‌గుడ్‌ రొమాంటిక్‌ ఫిల్మ్‌కు అవసరాల శ్రీనివాస్‌ దర్శకత్వం వహిస్తున్నారు. ఈ సినిమా ఫస్ట్‌ లుక్‌ పోస్టర్‌ సోమవారం విడుదల చేశారు. నాగశౌర్య, మాళవిక ఫార్మల్‌ వింటర్‌వేర్‌లో ఉండి, ఒకరిపై మరొకరు వాలిపోయి సంగీతం వింటూ ఈ పోస్టర్‌లో కనిపించారు. ‘ఒక దశాబ్దం పాటు ఓ జంట మధ్య జరిగే ప్రేమ ప్రయాణం ఈ చిత్రం. హెచ్చు తగ్గులు కలిగిన ఆ ప్రయాణం ఆసక్తికరంగా ఉంటూ ప్రేక్షకులను కూడా వారితో పాటు తీసుకెళుతుంది. ఇందులో ప్రేమ సన్నివేశాలు చాలా సహజంగా, హృదయానికి హత్తుకొనే విధంగా ఉంటాయి. ఇంద్రధనుస్సులోని ఏడు విభిన్న రంగుల్లా ప్రేమను ప్రదర్శిస్తున్నాం’ అని దర్శకుడు అవసరాల చెప్పారు.