ఓటీటీలో విక్రమ్‌ ప్రభు ‘టానాక్కారన్’

కోలీవుడ్ యంగ్ డైనమైట్ విక్రమ్ ప్రభు... గతేడాది ఓటీటీలో విడుదలైన  ‘పులికుత్తి పాండి’ చిత్రంతో ప్రేక్షకుల్ని అలరించాడు. సినిమాకి మంచి రెస్పాన్స్ వచ్చింది. అంతకు ముందు సంవత్సరం విడుదలైన ‘అసురగురు’ చిత్రం కూడా సూపర్ హిట్టైంది. ఇక ఈ ఏడాది విడుదల కానున్న ఇతడి తాజా చిత్రం ‘టానాక్కారన్’. ఇందులో విక్రమ్ ప్రభు పోలీస్ గా నటిస్తున్నాడు.  జాతీయ అవార్డు గ్రహీత వెట్రిమారన్‌ వద్ద అసిస్టెంట్‌ డైరెక్టరుగా పనిచేసిన తమిళ్‌ దర్శకుడిగా పరిచయమవుతూ రూపొందింది ఈ సినిమా. అంజలీ నాయర్‌ కథానాయికగా నటించారు. ఇతర పాత్రల్లో లాల్‌, ఎంఎస్.భాస్కర్‌ తదితరులు నటించారు.

పోలీస్‌ శిక్షణలో ఎదురయ్యే కష్టనష్టాలను, సమస్యలను ఈ చిత్రంలో చూపించనున్నారు. ఎస్‌.ఆర్‌.ప్రభు నిర్మించిన ఈ సినిమాకు జిబ్రాన్‌ సంగీతం సమకూర్చారు. ఇప్పటికే ఈ చిత్రం టీజర్‌ విడుదలవగా, అభిమానుల్లో మంచి స్పందన వచ్చింది. ఈ నేపథ్యంలో ఈ చిత్రాన్ని ఏప్రిల్‌ నెలలో డిస్నీ ప్లస్‌ హాట్‌స్టార్‌లో విడుదల చేయనున్నట్టు చిత్రం బృందం అధికారికంగా ప్రకటించింది. అయితే, విడుదల తేదీని వెల్లడించాల్సి ఉంది.