Sarkaru Vaari Paata: ఎస్. ఎస్. థమన్ ఇంటర్వ్యూ
ABN, First Publish Date - 2022-05-01T00:21:15+05:30
సూపర్ స్టార్ మహేష్ బాబు, కీర్తి సురేష్ కాంబినేషన్లో దర్శకుడు పరశురామ్ తెరకెక్కించిన చిత్రం ‘సర్కారు వారి పాట’. మైత్రీ మూవీ మేకర్స్, జీఏంబీ ఎంటర్టైన్మెంట్, 14 రీల్స్ ప్లస్ బ్యానర్లపై
సూపర్ స్టార్ మహేష్ బాబు, కీర్తి సురేష్ కాంబినేషన్లో దర్శకుడు పరశురామ్ తెరకెక్కించిన చిత్రం ‘సర్కారు వారి పాట’. మైత్రీ మూవీ మేకర్స్, జీఏంబీ ఎంటర్టైన్మెంట్, 14 రీల్స్ ప్లస్ బ్యానర్లపై నవీన్ యెర్నేని, వై. రవిశంకర్, రామ్ ఆచంట, గోపీచంద్ ఆచంట సంయుక్తంగా నిర్మించారు. మే 12న ఈ చిత్రం ప్రపంచవ్యాప్తంగా గ్రాండ్గా విడుదల కాబోతోంది. ప్రస్తుతం ఈ చిత్ర ప్రచార కార్యక్రమాలు యమా జోరుగా సాగుతున్నాయి. తాజాగా ఈ చిత్రానికి సంగీతం అందించిన మ్యూజిక్ సెన్సేషన్ ఎస్.ఎస్. తమన్ మీడియాతో ముచ్చటించారు. మీడియాతో ఆయన పంచుకున్న ‘సర్కారు వారి పాట’ విశేషాలు..
ఒక పెద్ద స్టార్ హీరో సినిమాకి పని చేయడంలో లాభ నష్టాలు ఎలా వుంటాయి?
భారీ అంచనాలు ఉండటం ఒక ఇష్యూ. ఆ అంచనాలు అందుకోవడం కోసం ఏదైనా స్పెషల్ స్కూల్ వుంటే బావుండు అని అనిపిస్తుంటుంది. మ్యూజిక్ చేయడమే కాకుండా దాన్ని చక్కగా ప్రమోట్ చేసి జనాల దగ్గరికి తీసుకెళ్ళడం కూడా ఒక భాద్యతగా మారింది. చెవులకి మా సంగీతం వినిపించడమే కాకుండా.. మేము కూడా కనిపించాల్సిన తప్పనిసరి పరిస్థితిలోకి వచ్చేశాం. ఒకసారి చేశాం. ఇప్పుడది అలవాటుగా మారిపోయింది.
లిరికల్ వీడియోకి కూడా భారీగా ఖర్చు పెట్టడం మీతోనే మొదలైయింది కదా?
ఆడియో కంపెనీలు కూడా ఆసక్తి చూపిస్తున్నారు. పాట బాలేకపోతే వారు పెట్టుబడి పెట్టరు. వాళ్లకి కూడా కొన్ని లెక్కలు, టీమ్ వుంటుంది. అందరూ అప్రూవ్ చేయనిదే అంతంత బడ్జెట్లు రావు. పెట్టుబడికి తగిన రాబడి వస్తుందా లేదా అనేది చెక్ చేసుకుంటారు. 150 మిలియన్ వ్యూస్ సాధించడం అంత తేలిక విషయం కాదు. సినిమాలే కాదు పాటలు కూడా పాన్ ఇండియా అయిపోయాయి. ఒక పాట రీచ్ అవాలంటే.. అది గ్లోబల్గా ఉందా? ఎవరు పాడుతున్నారు? ఇలా చాలా అంశాలు వుంటాయి. ఈ భాద్యతలన్నీ తీసుకోవాల్సివస్తుంది.
ఇది వరకూ పాట స్లోగా హిట్టు అయ్యే పరిస్థితి వుండేది. కానీ ఇప్పుడన్నీ ఇన్స్టెంట్ హిట్స్ వస్తున్నాయి కదా..?
ఇది ఒత్తిడితో కూడుకున్న వ్యవహారమే. మంచి మ్యూజిక్ ఇవ్వడం ఒక ఎత్తు అయితే , అంచనాలు, ఒత్తిడిని భరించగలడా? అనేది కూడా చూస్తున్నారు. దర్శకుడు, హీరో, ఫ్యాన్స్.. ఇలా అందరూ మ్యూజిక్ తప్పు ఒప్పులు చెబుతుంటారు. దీంతో పాటు మిగతా భాషల పాటలతో కూడా పోటీ వుంటుంది. అయితే ఇలాంటి ఆరోగ్యకరమైన పోటీ వుంటే మంచిదే. ఈ ఒత్తిడి కూడా ఓ మంచి పాటని ఇవ్వడానికి అడ్వాంటేజ్గా వుంటుంది.
మల్టీ ప్రాజెక్ట్స్ చేస్తూ, అంచనాలు అందుకోవడం సాధ్యమా?
చాలా కష్టం. దీని కోసం బ్రెయిన్తో పాటు పరిగెత్తాలి. అయితే ఇప్పుడు మంచి విషయం ఏమిటంటే.. డిఫరెంట్ కథలతో సినిమాలు వస్తున్నాయి. దీంతో ఒకేలా కాకుండా డిఫరెంట్గా అలోచించే అవకాశం వుంది. జోనర్స్ మారడం వలన మ్యూజిక్ కూడా డిఫరెంట్ జోనర్స్లో వస్తుంది. సర్కారు వారి పాట విషయానికి వస్తే ఇది అవుట్ అండ్ అవుట్ కమర్షియల్ సినిమా. సినిమా మొత్తం స్పార్క్ తగ్గనే తగ్గదు. సినిమా అంతా షైనింగ్ కనిపిస్తూనే వుంటుంది. సర్కారు వారి పాట పవర్ ప్యాక్డ్ కమర్షియల్ ఎంటర్టైనర్.
ట్యూన్ బావుంటే ఆటోమేటిక్గా కన్విన్స్ అవుతారా? లేదా వేరే పద్దతి ఉంటుందా?
మేము ఎన్ని ట్యూన్స్ అయినా చేయడానికి రెడీగా వుంటాం. అయితే అది కథకు సరిపోతుందా లేదా? అనేది ముఖ్యం. దర్శకుడు ఎంతో కాలం కష్టపడి ఒక కథని రెడీ చేసుకుంటాడు. కథని లిరికల్గా చెప్పడానికి పాట కావాలి. ఇది చాలా పెద్ద బాధ్యత. ఇప్పడు కథలో నుంచి వచ్చే పాటలే ఎక్కువ. సర్కారు వారి పాటలో కళావతి పాట ఇలా కథలో నుంచి వచ్చిందే. చాలా రోజుల తర్వాత ఒక మెలోడి పాటకు థియేటర్ స్టేజ్ ఎక్కి ఆడియన్స్ డ్యాన్స్ చేస్తారు. అంత అద్భుతంగా వుంటుంది కళావతి సాంగ్.
కళావతి పాట ఓకే అవ్వడానికి ఎన్ని వెర్షన్స్ చేశారు?
ఒకటే వెర్షన్. 2020 లాక్డౌన్లో చేసిన పాటది. నేను, దర్శకుడు పరశురామ్ గారు, గీత రచయిత అనంత శ్రీరామ్ జూమ్ కాల్లో మాట్లాడుతూ.. సినిమాలో హీరోయిన్ పేరుతో అనుకున్న ఫస్ట్ లైను. నాకు ‘సామజవరగమనా’.. దర్శకుడు పరశురామ్కి ‘ఇంకేం ఇంకేం కావాలె’ లాంటి మేలోడిస్ వున్నాయి. ఖచ్చితంగా ఆడియన్స్ చాలా అంచనాలతో ఉంటారు. అన్నిటికంటే ముఖ్యం మహేష్ బాబు గారు చాలా కాలం తర్వాత హీరోయిన్ పాత్రని ఉద్దేశించి పాడుతున్న ఒక బ్యూటిఫుల్ సాంగ్. ఇది చాలా ప్యూర్ గా డిజైన్ చేయాలని ముందే అనుకున్నాం. అలా కళావతి పాటతో కంపోజింగ్ స్టార్ట్ చేశాం. అయితే పాట కంపోజ్ చేసి రెండేళ్ళు దాటిపోయింది. ఈ గ్యాప్ లో పాటకు రోజు ప్రాణం పోస్తూ చివరిగా రిలీజ్ చేశాం. మా కష్టం వృధా కాలేదు. ఫాస్టెస్ట్గా 150 మిలియన్ వ్యూస్ క్రాస్ చేసి కళావతి పాట అందరినీ అలరించింది.
ఒక ఆల్బమ్లో ఆరు పాటలు ఉంటే మొదట ఏం పాట విడుదల చేయాలనే చర్చ ఉంటుందా?
ఖచ్చితంగా ఉంటుంది. మా సినిమానే కాకుండా ఆ సమయానికి బయట సినిమాలలో ఎలాంటి పాటలు వస్తున్నాయనేది కూడా చూస్తాం. కళావతి పాట విడుదలకి ముందు డీజే టిల్లు, లాలా భీమ్లా, బీస్ట్ పాటలు ట్రెండింగ్లో వున్నాయి. ఈ మూడు పాటలు కూడా లౌడ్ మాస్ సాంగ్స్. అలాంటి సమయంలో మెలోడి సాంగ్ అయితే బెస్ట్ అని భావించాం. కళావతి పాట రిలీజ్ చేశాం. అయితే లాక్ డౌన్ లో చాలా ఆర్ధిక సమస్యలు ఉన్నప్పటికీ.. పాటని నమ్మి లిరికల్ వీడియోకి రూ. 30 లక్షలు ఖర్చుపెట్టారు. నేను, సిద్ శ్రీరామ్ చెన్నయ్లో గ్రాండ్గా త్రీడీ ఇమాజినేషన్లో పియానో బ్యాక్ డ్రాప్లో షూట్ చేశాం. ఈ విషయంలో నిర్మాతల గొప్పదనాన్ని అభినందించాలి. మా నిర్మాతలకి సినిమాపై బలమైన ప్యాషన్ వుంది. నిర్మాతలు రాజీపడకుండా ఖర్చు చేయడం వలనే ఈ రోజు పాట ఇంత హిట్ అయ్యింది. సినిమా నుండి రాబోతున్న మరో రెండు మాస్ సాంగ్స్ కూడా అద్భుతంగా వుంటాయి.
ఇలా ప్రతి పాటకి ఖర్చు చేస్తే మీ రెమ్యూనరేషన్ కంటే ఎక్కువ అవుతుందేమో?
మరీ అంత వెరైటీ స్టెప్స్ తీసుకోము( నవ్వుతూ).. ఏ పాటకి చేయాలి ఏ పాటకు చేయకూడదనేది తెలుసు. పాట ఫిబ్రవరిలో విడుదల చేశాం. సినిమా మే లో రిలీజ్. అంటే అప్పుడే హీరో హీరోయిన్ విజువల్స్ బయటికి ఇవ్వలేం కదా.. అలా చేస్తా మళ్ళీ ప్రమోషన్స్కి కంటెంట్ వుండదు. అందుకే ఇలా స్పెషల్ షూట్ చేయాల్సి వచ్చింది. తర్వాత మహేష్ బాబుగారి డాటర్ సితారతో పెన్నీ సాంగ్ చేశాం. సితార రాక్ స్టార్. సితార వీడియోలు కొన్ని మహేష్గారికి చూపించి.. పెన్నీ సాంగ్ సితారతోనే చేస్తే బాగుంటుందని రిక్వెస్ట్ చేశా. తర్వాత నమ్రతగారిని కలసి చెప్పా. ఓకే చెప్పారు. మేము మార్నింగ్ నుండి చేస్తూ ఉంటే.. సితార కేవలం మూడు గంటల్లో సాంగ్ షూటింగ్ పూర్తి చేసింది. ఫైనల్ కట్ చూసిన మహేష్గారు చాలా హ్యాపీగా ఫీలయ్యారు.
ఇన్స్ట్రుమెంట్స్, సింగర్స్ విషయంలో ఈ సినిమాకి ఎలాంటి కొత్తదనాన్ని చూపించారు?
సర్కారు వారి పాట మ్యూజిక్ కంప్లీట్ అర్బన్గా వుంటుంది. లాక్ డౌన్ కారణంగా ఈ సినిమా ఆలస్యం అవుతుందని ముందే తెలుసు. అయితే ఎప్పుడు వచ్చినా ఫ్రెష్గా వుండే సౌండ్స్ వుండాలని ముందే ఫిక్స్ అయ్యా. శంకర్ గారి సినిమాలు ఇలా జరుగుతుంటాయి. ట్యూన్ ఎప్పుడు ఓకే అయినా రిలీజ్ అయ్యే వరకూ కొత్తగా ప్రోగ్రామ్ చేస్తూనే వుంటారు. సర్కారు వారి పాటలో మ్యూజిక్ని ఎప్పటికప్పుడు కొత్తగా ప్రోగ్రామ్ చేస్తూనే వచ్చాం.
దర్శకుడు పరశురామ్గారి మ్యూజిక్ టేస్ట్ ఎలా ఉంటుంది?
పరశురామ్ గారితో ‘ఆంజనేయులు, శ్రీరస్తు శుభమస్తు’ చేశా. సర్కారువారి పాట మూడో సినిమా ఇది. ఆయనతో పని చేయడం అలవాటే. అయితే పరశురామ్ గారి గీత గోవిందం ఆడియో పరంగా కూడా పెద్ద హిట్. దాన్ని బ్యాలన్స్ చేయాలి. అన్నిటికంటే మహేష్ బాబుగారి సినిమా అంచనాలు అందుకోవడం పెద్ద ఛాలెంజ్. మహేష్ బాబుగారి ఫ్యాన్స్ సినిమా కోసం రెండేళ్ళుగా ఎదురుచూస్తున్నారు. అయితే వారి అంచనాలు ఏ మాత్రం తగ్గకుండా సర్కారు వారి పాట ఉండబోతుంది.
ఎంతో కష్టపడి చేసిన సాంగ్ లీక్ అవ్వడంతో ఎలా ఫీలయ్యారు?
కోపం రాలేదు కానీ చాలా బాధ అనిపించింది. ఇప్పటికే కరోనాతో నిర్మాతలు కుదేలయ్యారు. ఇలాంటి సమయంలో ఇండస్ట్రీ బాగు కోరుకోవాలి కానీ ఇలాంటి పనులు ఎలా చేస్తారో అర్ధం కాదు. లీకు ఎవరు చేశారో తెలిసింది. కానీ ఏం చేస్తాం.. మా నిర్మాతలు పెద్ద మనసున్న వ్యక్తులు. కెరీర్ నాశనం కాకూడదని వార్నింగ్ ఇచ్చి పంపించేశాం.
ఇప్పుడు అందరు స్టార్లు తమన్ మ్యూజిక్ కావాలని అంటున్నారు . ఇది మీకు గోల్డెన్ పిరియడ్ అనుకోవచ్చా?
గోల్డెన్ పిరియడ్ అని చెప్పను. వాళ్ళు నాపై పెట్టుకున్న నమ్మకానికి తగ్గట్టు కష్టపడి పని చేయాలి. వాళ్ళ ట్రస్ట్ని రస్ట్ చేయకపోతే చాలు.
మ్యూజిక్కి కొత్తగా ఏదైనా చేయాలని ఉందా?
ఇండిపెండెంట్గా మ్యూజిక్ తేవాలి. ఫిల్మ్ మ్యూజిక్ని ఇంటర్నేషనల్గా తీసుకెళ్ళాలి. తెలుగు సినిమా నేడు పాన్ వరల్డ్గా వెళ్ళింది. మ్యూజిక్ విషయంలో బాధ్యత ఇంకా పెరిగింది.
తమన్ అన్నీ వందకోట్ల సినిమాలే చేస్తాడని ప్రచారంలో వుంది?
ఈ ప్రచారంలో నిజం లేదు. మ్యూజిక్కి స్కోప్ వుండే అన్ని సినిమాలు చేయాలని వుంటుంది.
ఈ మధ్య కాలంలో మీరు విన్న యునిక్ వాయిస్?
సిద్ శ్రీరామ్. ఇది వరకు నా దగ్గర చాలా హిట్స్ పాడారు. కళావతి పాటలో సిద్ శ్రీరామ్ మరింత యునిక్గా అనిపించింది. గాడ్ ఫాదర్లో ఒక బ్లైండ్ సింగర్తో పాట పాడించాం. ఆ పాట కూడా అద్భుతంగా ఉండబోతుంది.
సర్కారు వారి పాటలో మీకు సవాల్గా అనిపించిన పాట?
టైటిల్ సాంగ్. టైటిల్ సాంగ్ చేయడం చాలా కష్టం. నాకు, మహేష్గారికి దూకుడు, ఆగడు, బిజినెస్ మ్యాన్ సినిమాలు వున్నాయి. సర్కారు వారి టైటిల్ సాంగ్కి వచ్చేసరికి ఎక్కువ కష్టపడ్డాం. అయితే ఫైనల్గా అద్భుతమైన పాట వచ్చింది.
కొత్తగా చేస్తున్న సినిమాలు?
రామ్ చరణ్, శంకర్గారి సినిమా ఒక పాట బ్యాలెన్స్ వుంది. చిరంజీవిగారి ‘గాడ్ ఫాదర్’ కూడా ఒకటే పాట బ్యాలెన్స్. విజయ్తో చేస్తున్న సినిమాకి మూడు పాటలు రికార్డ్ చేశాం. ఇంకొన్ని సినిమాలకి సంబంధించి రికార్డింగ్ జరుగుతుంది.
బాలీవుడ్ వెళ్తున్నారని విన్నాం?
చర్చలు జరుగుతున్నాయి.