ఐటెమ్‌ రాజా... పటాస్‌ పిల్ల

సిద్దు జొన్నలగడ్డ కథానాయకుడిగా నటించిన చిత్రం ‘డిజె టిల్లు’. నేహా శెట్టి కథానాయిక. విమల్‌ కృష్ణ దర్శకత్వం వహించారు. సూర్యదేవర నాగవంశీ నిర్మాత. ఈ చిత్రంలోని ‘రాజ రాజ ఐటం రాజా.. పటాస్‌ పిల్ల.. పటాస్‌ పిల్ల’ అనే గీతాన్ని సోమవారం విడుదల చేశారు. అనిరుథ్‌ ఆలపించిన ఈ గీతాన్ని కిట్టు విస్సాప్రగడ రచించారు. శ్రీచరణ్‌ పాకాల స్వరాలు అందించారు. విజయ్‌బిన్ని నృత్యరీతులు సమకూర్చారు. ఈ సందర్భంగా కిట్టు విస్సాప్రగడ మాట్లాడుతూ ‘‘సంగీత దర్శకుడు శ్రీచరణ్‌తో నాకు మంచి అనుబంధం ఉంది. తనకు దాదాపు 30 పాటలు రాశాను. ఈ పాటకు సంబంధించి ముందు పల్లవి వరకూ ట్యూన్‌ పంపారు. హుక్‌ లైన్‌ ఒకటి ఉంటే బాగుంటుందనిపించింది. అందుకే ‘పటాసు పిల్ల’ అనే లైన్‌ పట్టాను. అది అందరికీ బాగా నచ్చింది. ఆ తరవాత.. మిగిలిన పాట చక చకా రాసేశాను’’ అన్నారు. ఇప్పటి వరకూ విడుదల చేసిన పాటలు, ప్రచార చిత్రాలకూ మంచి స్పందన వస్తోందని, త్వరలోనే విడుదల తేదీ ప్రకటిస్తామని నిర్మాత తెలిపారు.