టైటిల్‌ ఇంత వైరల్‌ అవుతుందనుకోలేదు

‘దండుపాళ్యం’తో ఆకట్టుకొన్న దర్శకుడు శ్రీనివాస్‌ రాజు. ఇప్పుడు ‘తగ్గేదే లే’ అంటూ మరో కథ చెప్పబోతున్నారు. నవీన్‌ చంద్ర కథానాయకుడిగా నటించిన చిత్రమిది. త్వరలోనే విడుదల కానుంది. ఈ సందర్భంగా దర్శకుడు మాట్లాడుతూ ‘‘కరోనా సమయంలో ‘తగ్గేదే లే..’ అనే డైలాగ్‌ బాగా పాపులర్‌ అయ్యింది. అదే టైటిల్‌ని మా సినిమాకి ఎంచుకొన్నాం. టైటిల్‌ పెట్టగానే అందరిలో వెళ్లిపోయింది. ఇంత వైరల్‌ అవుతుందని అస్సలు అనుకోలేదు. ఈ సినిమాలోని ప్రతి పాత్ర ‘తగ్గేదే లే’ అన్నట్టు ప్రవర్తిస్తుంటుంది. అందుకే ఈ పేరు పెట్టాం. ఇదో మర్డర్‌ మిస్టరీ. అయితే ప్రేమకథకు కూడా ప్రాధాన్యం ఉంది. సినిమాలో సగం ప్రేమకథే ఉంటుంది. ఆ సన్నివేశాలన్నీ చాలా కొత్తగా అనిపిస్తాయి. తెలిసిన కథనే సింపుల్‌గా చెప్పడం నాకు ఇష్టం. ‘తగ్గేదే లే’ కూడా అలాంటి కథే. బుర్రకు పని పెట్టలేదు. సరదాగా చూస్తూ కూర్చుండిపోవొచ్చు. నాకు ఒకే రకమైన సినిమాలు తీయడం ఇష్టం ఉండదు. ప్రతీ సినిమాకీ ఓ కొత్త జోనర్‌ ప్రయత్నించాలని ఉంటుంది. రాబోయే రోజుల్లోనూ ఇలానే కొత్త తరహాలో ఆలోచిస్తా’’ అన్నారు.