రహస్యంగా షూటింగ్‌లో పాల్గొంటున్న సుస్మితాసేన్ మాజీ ప్రియుడు రోహ్మాన్ షాల్.. ఎందుకోసమంటే..?

మాజీ మిస్ యూనివర్స్, బాలీవుడ్ నటి సుస్మితా సేన్, ప్రముఖ మోడల్ రోహ్మాన్ షాల్‌ను ప్రేమించిన సంగతి తెలిసిందే. ఈ జంట ఒకరికొకరు సోషల్ మీడియా వేదికగా 2018లో పరిచయమయ్యారు. అనంతరం ఆ పరిచయం కాస్తా ప్రేమకు దారితీసింది. దీంతో తనకంటే 15ఏళ్లు చిన్నవాడైన రోహ్మాన్‌తో ఆమె డేటింగ్ చేయడం మొదలుపెట్టింది. ఏమైందో తెలియదు కానీ, ఈ జంట కొన్ని రోజుల క్రితమే తమ బంధానికి బ్రేకప్ చెప్పింది. 

తాజాగా రోహ్మాన్‌కు సంబంధించిన ఓ వార్త బాలీవుడ్‌లో హల్‌చల్ చేస్తోంది. సినిమాల్లోకి అతడు ఎంట్రీ ఇవ్వబోతున్నట్టు బీ టౌన్‌లో గుసగుసలు వినిపిస్తున్నాయి. రోహ్మాన్ 2017నుంచే నటనకు సంబంధించిన కోర్సులు కూడా నేర్చుకుంటున్నాడు. అతడు నటిస్తున్న ప్రాజెక్టు వివరాలన్ని అత్యంత రహస్యంగా ఉంచుతున్నారు. ఈ ప్రాజెక్టు త్వరలోనే ప్రేక్షకుల ముందుకు రాబోతోంది. ఈ వార్తలపై రోహ్మాన్ కూడా స్పందించాడు. ‘‘నా మీద కొంత భాగాన్ని షూట్ చేసిన మాట వాస్తవమే. నిర్మాతల నుంచి అనుమతి రాగానే అందుకు సంబంధించిన వివరాలను నేనే వెల్లడిస్తాను. ప్రస్తుతం ఈ ప్రాజెక్టు పోస్ట్ ప్రొడక్షన్ వర్క్ జరుపుకొంటోంది. మీ దీవెనలు నాకు కావాలి’’ అని అతడు చెప్పాడు.

సుస్మితా సేన్, రోహ్మాన్ షాల్ తమ బంధం ముగిసిపోయిందని కొన్ని రోజుల క్రితమే ప్రకటించారు. ఈ విషయాన్ని తెలుపుతూ సుస్మితాసేన్ ఇన్‌స్టాగ్రామ్ వేదికగా ఓ మెసేజ్‌ను అభిమానులతో పంచుకుంది. ‘‘స్నేహితులుగా బంధాన్ని మొదలుపెట్టాం. స్నేహితులుగానే ఉంటాం. రిలేషన్ షిప్ మాత్రం ముగిసిపోయింది’’ అని ఆమె తెలిపింది.