క్షమాపణలు చెప్పిన ‘కచ్చా బాదామ్’ సింగర్.. కారణమేంటంటే..

‘కచ్చా బాదామ్’ సాంగ్ సోషల్ మీడియాను విపరీతంగా ఊపేసిన సంగతి తెలిసిందే

‘కచ్చా బాదామ్’ సాంగ్ సోషల్ మీడియాను విపరీతంగా ఊపేసిన సంగతి తెలిసిందే. సామాన్యూల నుంచి సెలెబ్రిటీల వరకు ఈ పాటకు స్టెప్పులేశారు. ఈ పాటను పల్లీలు అమ్ముకునే వ్యక్తి భుబన్ బద్యకర్ రాసి, ఆలపించాడు. దీంతో అతడు ఓవర్‌నైట్ స్టార్‌గా మారిపోయాడు. ఆ సమయంలో మీడియాకు ఇంటర్వ్యూ ఇచ్చాడు. ‘‘నేను ఆర్టిస్టుగా ఉండాలనుకుంటున్నాను. ప్రస్తుతం నేను సెలబ్రెటీగా మారిపోయాను. ఈ స్థితిలో పల్లీలను అమ్మితే అవమానకరంగా ఉంటుంది’’ అని భుబన్ బద్యకర్ చెప్పాడు. భుబన్ ఈ విధంగా అనడంతో పలువురి నుంచి విమర్శలు ఎదుర్కొన్నాడు. దీంతో ఆ మాటలను వెనక్కి తీసుకుంటున్నట్టు తాజాగా అతడు తెలిపాడు. తప్పనిసరి అయితే పల్లీలను అమ్ముతానని వెల్లడించాడు.

భుబన్‌కు తాజాగా సన్మానం జరిగింది. ఈ సన్మాన కార్యక్రమంలో అతడు మాట్లాడాడు. ‘‘ఆ మాటలను అని ఉండకూడదు. అందుకు నేను క్షమాపణలు చెబుతున్నాను. ప్రజలే నన్ను సెలబ్రెటీని చేశారు. తప్పనిసరి పరిస్థితులు ఎదురైతే మరోసారి పల్లీలు అమ్మడం మొదలుపెడతాను. ప్రపంచవ్యాప్తంగా అందరి నుంచి నాకు ప్రేమ లభించింది. ఈ ప్రేమ లభించాలంటే ఎంతో అదృష్టం ఉండాలి. సెలబ్రెటీగా మారినప్పటికీ సాధారణ జీవితాన్ని మాత్రమే నేను గడుపుతున్నాను. వ్యక్తిగా నేను ఏ మాత్రం మారలేదు’’ అని భుబన్ బద్యకర్ చెప్పాడు.