ఆరు గెటప్స్‌లో అరవింద స్వామి.. త్వరలోనే రిలీజ్

సెల్వా దర్శకత్వంలో రూపుదిద్దుకుంటున్న చిత్రం ‘వణంగాముడి’. అరవింద్‌ స్వామి, రితికా సింగ్‌, సిమ్రన్‌, చాందిని, తంబి రామయ్య, జయప్రకాష్‌ తదితరులు నటిస్తున్నారు. మేజిక్‌ బాక్స్‌ ఫిలిమ్స్‌ పతాకంపై గణేష్‌ రవిచంద్రన్‌ నిర్మిస్తున్నారు. ఈ చిత్రం టీజర్‌ ఇటీవలే రిలీజ్‌ చేశారు. దీన్ని చూసిన ప్రతి ఒక్కరూ ఈయన అరవింద్‌ స్వామేనా? అని ఆశ్చర్యపోయేలా వివిధ గెటప్స్‌ల్లో కనిపించారు. 

ఈ చిత్ర కథ గురించి దర్శకుడు సెల్వా మాట్లాడుతూ.. ఇది పోలీస్‌ స్టోరీ. సాధారణ పోలీస్‌ కథలకు భిన్నంగా రూపొందిస్తున్నాం. ముఖ్యంగా తన తెలివితేటలను ఉపయోగించి నేరస్థులను పోలీస్‌ అధికారి ఏ విధంగా గుర్తించారు. ఆ పోలీస్‌ అధికారి జీవితానికి, ఈ కేసుకు ఏమిటి సంబంధం అనే విషయాన్ని ఆసక్తికరంగా తెరకెక్కిస్తున్నాం. ఇందులో అరవింద్‌ స్వామి ఆరు గెటప్పుల్లో కనిపించనున్నారు. ఆయన ఇప్పటివరకు నటించిన చిత్రాలకు ఇది పూర్తి భిన్నంగాను, ప్రత్యేక చిత్రంగా నిలుస్తుందని వెల్లడించారు. ఈ చిత్ర షూటింగ్‌ చివరి దశలో ఉందని, ఇతర కార్యక్రమాలను కూడా పూర్తి చేసి త్వరలోనే విడుదల చేస్తామని ఆయన వెల్లడించారు.