మంచు విష్ణు ‘చదరంగం’కు బెస్ట్ వెబ్ సిరీస్ అవార్డ్

ఇండియాలోనే ఉత్తమ ప్రాంతీయ వెబ్ సిరీస్‌గా మంచు విష్ణు నిర్మించిన ‘చదరంగం’ తెలుగు వెబ్ సిరీస్ అవార్డును దక్కించుకుంది. 24 ఫ్రేమ్స్ ఫ్యాక్టరీ బ్యానర్‌పై రూపొందిన ఈ వెబ్ సిరీస్‌కు రాజ్ అనంత దర్శకత్వం వహించారు. మంచు విష్ణు తన బ్యానర్‌లో నిర్మించిన మొట్టమొదటి వెబ్ సిరీస్ ఇది. 2020, ఫిబ్రవరిలో జీ 5 ఓటీటీలో ఈ వెబ్ సిరీస్ విడుదలై మంచి ఆదరణను పొందింది. ఆన్-డిమాండ్ వీడియో, ఆడియో కంటెంట్‌లో రాణించిన వాటిని గౌరవించాలని ఎక్ఛేంజ్ 4 మీడియా(ఇ4ఎమ్) గ్రూప్ స్ట్రీమింగ్ మీడియా అవార్డ్స్‌ను ఈ సంవత్సరం (2021) నుంచి ప్రారంభించింది. ఈ అవార్డ్స్‌లో ‘చదరంగం’ వెబ్ సిరీస్ ఉత్తమ ప్రాంతీయ వెబ్ సిరీస్‌గా అవార్డును గెలుపొందింది. ఈ వెబ్ సిరీస్‌లో హీరో శ్రీకాంత్ ప్రధాన పాత్ర పోషించగా.. చలపతిరావు, నాగినీడు, కౌసల్య, సునైనా తదితరులు ఇతర పాత్రలలో నటించారు.

ఇక ఈ అవార్డు రావడం పట్ల మంచు విష్ణు ట్విట్టర్ వేదికగా తన సంతోషాన్ని వ్యక్తం చేశారు. ‘‘ఈ గుర్తింపుకు ధన్యవాదాలు. శ్రీకాంత్‌గారు, డైరెక్టర్ రాజ్, ఎగ్జిక్యూటివ్ నిర్మాత విజయ్, ఇతర తారాగణం మరియు సాంకేతిక నిపుణులందరూ ఈ అవార్డుకు అర్హులు. మమ్మల్ని నమ్మినందుకు జీ5కు ధన్యవాదాలు. డిజిటల్ ప్లాట్‌ఫామ్‌లన్నింటిలో భారతదేశంలోనే ఉత్తమ ప్రాంతీయ వెబ్ సిరీస్‌గా ‘చదరంగం’ ఎంపికవడం చాలా గర్వకారణంగా ఉంది’’ అని ట్వీట్‌లో పేర్కొన్న మంచు విష్ణు భవిష్యత్‌లో మరిన్ని మంచి ప్రాజెక్ట్‌‌లను ప్రేక్షకులకు అందించేలా ఈ అవార్డు తమలో ఉత్తేజాన్ని నింపిందని తెలిపారు.