‘ఊరికి ఉత్త‌రాన’.. ఎక్కడో విన్నట్టు ఉంది కదా..

'ఊరికి ఉత్తరాన.. దారికి దక్షిణాన..' ఈ పాట యాడో విన్నట్టు ఉంది కదా!.. ఎక్కడో కాదు.. 'అరవింద సమేత వీరరాఘవ' చిత్రంలోనిది ఈ పాట. ఈ పాట ఎంత పెద్ద హిట్‌ అయ్యిందో తెలియంది కాదు. ఇప్పుడు ఈ పాటలోని లైన్‌ 'ఊరికి ఉత్తరాన'తో ఓ చిత్రం తెరకెక్కబోతోంది. ఈగిల్ ఐ ఎంటర్టైన్మెంట్ బ్యానర్‌పై వనపర్తి వెంకటయ్య నిర్మిస్తున్న ఈ చిత్రంతో దిల్ రాజు సంస్థ‌తో పాటు కోన వెంక‌ట్‌, వేణు శ్రీ‌రామ్‌ల వ‌ద్ద ద‌ర్శ‌క‌త్వ శాఖలో ప‌నిచేసిన స‌తీష్ ప‌రమ‌వేద ద‌ర్శ‌కుడిగా ప‌రిచ‌యం అవుతున్నారు. అలాగే నరేన్ హీరో‌గా ప‌రిచ‌యం అవుతుండ‌గా, దీపాలి హీరోయిన్‌గా న‌టిస్తున్నారు. రామరాజు, 'మల్లేశం' ఫేం ఆనంద చక్రపాణి, ఫణి, జగదీష్ ప్రధాన పాత్రల్లో నటించారు. వ‌రంగ‌ల్‌లో జ‌రిగిన ఒక య‌థార్థ ఘ‌ట‌న ఆధారంగా రూపొందుతోన్న ఈ మూవీ షూటింగ్‌, పోస్ట్ ప్రొడ‌క్ష‌న్ ప‌నులు పూర్త‌య్యాయి. త్వ‌ర‌లో విడుద‌ల‌కు స‌న్నాహాలు చేస్తున్నట్లుగా చిత్రయూనిట్‌ ప్రకటించింది. ఇక నూత‌న సంవ‌త్స‌ర శుభాకాంక్ష‌లు తెలియ‌జేస్తూ చిత్ర పోస్ట‌ర్‌, మోష‌న్ పోస్ట‌ర్‌ల‌ను చిత్రయూనిట్‌ విడుద‌ల చేసింది. పోస్ట‌ర్‌లో హీరో న‌రేన్ ఓ టేబుల్ ముందు కూర్చొని ఏదో ఆలోచిస్తున్నారు. ఆయ‌న మెడ‌లోని తాయెత్తుకు మ‌హిమ ఉన్న‌ట్లుగా దాని చుట్టూ వెలుగు క‌నిపిస్తోంది. "ప్రేమ‌కు మ‌ర‌ణం లేదు.. కానీ ప్రేమిస్తే మ‌ర‌ణ‌మే..!" అనేది ఈ చిత్రానికి ట్యాగ్‌ లైన్‌. 

ఫస్ట్ లుక్‌ విడుదల సంద‌ర్భంగా చిత్ర నిర్మాత‌లు మాట్లాడుతూ, "తెలుగు సినీ ప‌రిశ్ర‌మ‌లో ఎంతో మంది ప్రముఖుల వ‌ద్ద ఎన్నో సినిమాల‌కు ద‌ర్శ‌క‌త్వ శాఖ‌లో ప‌ని చేసిన స‌తీష్ ప‌ర‌మ‌వేద ఓ మంచి క‌థ‌తో ఊరికి ఉత్త‌రాన‌ చిత్రాన్ని అంద‌రికీ న‌చ్చేలా తెర‌కెక్కించారు. న‌రేన్ హీరోగా ప‌రిచ‌యం అవుతున్నాడు. త‌న‌కు ఇది తొలి సినిమా అయిన‌ప్ప‌టికీ ఎంతో అనుభ‌వం ఉన్న న‌టుడిలా ప‌ర్ఫార్మెన్స్ క‌న‌బ‌రిచాడు. అలాగే  పెద్ద హీరోల చిత్రాల‌కు ప‌ని చేస్తోన్న భీమ్స్ సిసిరోలియో, సురేష్ బొబ్బిలి మ్యూజిక్ మా సినిమాకు ప్ర‌ధాన ఆక‌ర్ష‌ణ‌గా నిల‌వ‌నుంది. త్వ‌ర‌లోనే మా చిత్రానికి సంబంధించిన టీజ‌ర్ ప్ర‌ముఖుల‌ స‌మ‌క్షంలో రిలీజ్ చేయ‌డానికి స‌న్నాహాలు చేస్తున్నాం" అని తెలిపారు.