‘భాగ్ సాలే’గా కీరవాణి తనయుడు

సంగీత దర్శకుడు కీరవాణి తనయుడు శ్రీసింహ కోడూరి.. ‘మత్తు వదలరా’, ‘తెల్లవారితే గురువారం’ చిత్రాల తర్వాత హీరోగా నటిస్తున్న మూడో చిత్రం ‘భాగ్ సాలే’. ఈ సినిమా షూటింగ్ ప్రారంభోత్సవం సోమవారం ఉదయం హైదరాబాద్ రామానాయుడు స్టూడియోలో జరిగింది. ముహూర్తపు సన్నివేశానికి నిర్మాత సురేష్ బాబు కెమెరా స్విచ్ఛాన్ చేయగా.. దర్శకుడు హరీష్ శంకర్ ఫస్ట్ షాట్‌కు క్లాప్ కొట్టారు. సురేష్ ప్రొడక్షన్స్ పతాకంపై డి సురేష్ బాబు సమర్పణలో బిగ్ బెన్ సినిమా, సినీ వ్యాలీ మూవీస్ సంస్థలు సంయుక్తంగా నిర్మిస్తున్న ఈ చిత్రానికి యష్ రంగినేని, శింగనమల కళ్యాణ్ నిర్మాతలు. ప్రణీత్ బ్రహ్మాండపల్లి దర్శకత్వంలో క్రైమ్ కామెడీ జానర్‌లో ఈ చిత్రం తెరకెక్కనుంది. కీరవాణి మరో తనయుడు కాలభైరవ సంగీతం అందిస్తున్న ఈ చిత్రంలో జాన్ విజయ్, రాజీవ్ కనకాల, వెన్నెల కిషోర్, నందినీరాయ్, సుదర్శన్, వంశీ నెక్కంటి, వైవా హర్ష, కిడ్ చక్రి, జయవాణి తదితరులు ఇతర పాత్రల్లో నటిస్తున్నారు.