మగబిడ్డకు జన్మనిచ్చిన కరీనా!

బాలీవుడ్ ప్రముఖ కథానాయిక కరీనా కపూర్ మరోసారి తల్లి అయింది. తాజాగా పండంటి మగ బిడ్డకు జన్మనిచ్చింది. ఈ రోజు (ఆదివారం) ఉదయం 9 గంటలకు ముంబైలోని బ్రీచ్ కాండీ హాస్పిటల్‌లో కరీనాకు ప్రసవం జరిగిందని, మగ బిడ్డ జన్మించాడని రణ్‌ధీర్ కపూర్ వెల్లడించారు. తల్లి, బిడ్డ చాలా ఆరోగ్యంగా ఉన్నారని, తమ కుటుంబంలోకి మరో వ్యక్తి వచ్చి చేరారని రణ్‌ధీర్ సంతోషం పంచుకున్నారు. 

బాలీవుడ్‌ స్టార్‌ హీరో సైఫ్‌ అలీఖాన్‌తో ప్రేమలో పడిన కరీనా 2012లో ఆయనతో వివాహబంధంలోకి అడుగుపెట్టింది. ఈ దంపతులకు 2016లో తైమూర్‌ అలీఖాన్‌ జన్మించాడు. తాను మరోసారి గర్భం దాల్చానని గతేడాది కరీనా ప్రకటించింది. గర్భంతో ఉన్న సమయంలో కూడా ఆమిర్‌ఖాన్‌తో కలిసి `లాల్ సింగ్ చద్దా` షూటింగ్‌కు హాజరైంది. అలాగే పలు బ్రాండ్లకు ప్రచారకర్తగానూ వ్యవహరించింది. కాగా, డెలివరీ తర్వాత కరీనా, చిన్నారితో కలిసి ఉన్న సైఫ్ ఫొటో ప్రస్తుతం సోషల్ మీడియాలో వైరల్‌గా మారింది.