కరోనా కష్టకాలంలో గొప్పమనసు చాటుకుంటోన్న సంజన

యంగ్ రెబల్ స్టార్ ప్రభాస్ ‘బుజ్జిగాడు’ సినిమాలో నటించిన సంజన అందరికీ పరిచయమే. ఆ తర్వాత తెలుగులో మరికొన్ని చిత్రాల్లో ఆమె నటించింది కానీ స్టార్ స్టేటస్‌ని మాత్రం అందుకోలేకపోయిందీ శాండల్ వుడ్ నటి. అయితే ఈ కరోనా కష్టకాలంలో ఆకలితో అలమటిస్తున్న పేదలకు ఆహరం, శాండల్ వుడ్ సినీ కార్మికుల కుటుంబాలకు తాను స్థాపించిన సంజన గల్రాని ఫౌండేషన్ ద్వారా నిత్యావసర సరుకులను పంపిణీ చేస్తూ.. తన గొప్పమనసును చాటుకుంటోంది. ఎందరో సెలబ్రిటీలు ఈ కష్టకాలంలో పేదలకు అండగా ఉండి, వారి కష్టాలను తమ శాయశక్తులా తీర్చే ప్రయత్నం చేస్తున్నారు. నటి సంజనా కూడా నిర్విరామంగా ఎందరికో తన సంస్థ ద్వారా సహాయం అందిస్తూ.. మన్ననలు అందుకుంటోంది. 

ఈ సందర్భంగా సంజన మాట్లాడుతూ.. ‘‘కోవిడ్‌ బాధితులు మెరుగైన ఆరోగ్యంతో కోలుకోవాలని, వారిలో సానుకూలమైన ఆలోచనలను పెంపొందాలని, వారి జీవితాల్లో తిరిగి సంతోషం వెల్లివిరియాలని మనస్ఫూర్తిగా ఆకాంక్షిస్తున్నాను. తమ జీవితాలను, కుటుంబ సభ్యుల ఆరోగ్యాలను పణంగా పెట్టి పనిచేస్తున్న ఫ్రంట్‌లైన్‌ వర్కర్స్‌తో పాటుగా కోవిడ్‌ కట్టడిలో భాగస్వామ్యులైన అందరికీ కృతజ్ఞతలు తెలుపుకుంటున్నాను. మాస్కులు ధరించడం, ప్రతిరోజు శానిటైజ్‌ చేసుకోవడం, భౌతికదూరం పాటించడం.. ఇలా కోవిడ్‌ నియంత్రణ చర్యలను పాటించడం వల్లనే ఈ ప్రపంచం కోవిడ్‌ మహమ్మారి నుంచి బయటపడుతుంది. నేను స్థాపించిన సంజన గల్రాని ఫౌండేషన్ ద్వారా ఉడతా భక్తిగా మే 10 నుంచి.. మా ఇంటి సెల్లార్ లోనే వంట వండించి రోజూ 500 మంది రెండు పూటలా పేదవారికి ఆహారం అందిస్తున్నాను. అదేవిధంగా లాక్‌డౌన్ కారణంగా రోజూ వారి కూలికి పనిచేసే సినీ పరిశ్రమకు చెందిన లైట్ బాయ్స్, ప్రొడక్షన్ ఫోర్త్ క్లాస్ కార్మికులకు 500 కుటుంబాలకు నిత్యావసర సరుకులను జూన్ 2న అందించాను. భవిష్యత్‌లో కూడా ఇలాంటి సహాయాలను కొనసాగిస్తాను. దయచేసి అందరూ ఇంట్లోనే ఉండండి. కోవిడ్‌ నియంత్రణ చర్యలను పాటించండి. పాజిటివ్‌గా ఉండండి కానీ కోవిడ్‌ పాజిటివ్‌ తెచ్చుకోకండి’’ అని పేర్కొన్నారు.