‘గ్రీన్ ఇండియా ఛాలెంజ్’: పునీత్ రాజ్‌కుమార్ గుర్తుగా మొక్కనాటిన విశాల్

రాజ్యసభ సభ్యులు జోగినిపల్లి సంతోష్ కుమార్ చేపట్టిన ‘గ్రీన్ ఇండియా ఛాలెంజ్’ కార్యక్రమం నిర్విఘ్నంగా ముందుకు సాగుతుంది. కాలాల్ని, సంస్కృతుల్ని, స్మృతుల్ని తనలో మిలితం చేసుకొని సరికొత్తగా తన ప్రస్థానాన్ని కొనసాగిస్తుంది. తాజాగా ‘ఎనిమి’ చిత్ర ప్రమోషన్ కోసం హైదరాబాద్ వచ్చిన నటులు విశాల్, ఆర్య, నటి మిర్నాళిని రవి ఈ గ్రీన్ ఇండియా ఛాలెంజ్‌లో పాల్గొని హైటెక్స్ ప్రాంగణంలో మొక్కలు నాటారు. హీరో విశాల్ తను నాటిన మొక్క.. ఇటీవల చనిపోయిన కన్నడ పవర్ స్టార్ పునీత్ రాజ్‌కుమార్ గుర్తుగా ఉండిపోతుందని అన్నారు. 

ఈ సందర్భంగా విశాల్ మాట్లాడుతూ.. ‘‘తెలంగాణ ముఖ్యమంత్రి కేసీఆర్‌గారి ప్రభుత్వ మానసపుత్రిక ‘హరితహారం’ స్పూర్తితో సంతోష్ కుమార్‌గారు  ప్రారంభించిన గ్రీన్ ఇండియా చాలెంజ్ కార్యక్రమంలో పాల్గొని మొక్కలు నాటడం సంతోషంగా ఉంది. ప్రకృతి, సమాజం పట్ల బాధ్యతతో వారు ప్రారంభించిన ఈ ఛాలెంజ్ గ్లోబల్ వార్మింగ్‌ని అరికట్టడానికి దోహదపడుతుంది. భవిష్యత్ తరాల మనుగడకు అవకాశం కల్పిస్తుంది. అందుకే ప్రతి ఒక్కరు బాధ్యతగా ఈ ఛాలెంజ్‌లో పాల్గొని మొక్కలు నాటాలని కోరుతున్నాను. నా స్నేహితుడు పునీత్ రాజ్ కుమార్ గుర్తుగా ఈరోజు మొక్కని నాటుతున్నాను. ఈ మొక్క నా స్నేహితునికి గుర్తుగా ఉండిపోతుంది..’’ అని అన్నారు. 

మరో హీరో ఆర్య మాట్లాడుతూ.. గ్రీన్ ఇండియా ఛాలెంజ్‌లో భాగస్వామ్యమై మొక్కలు నాటడం ఆనందంగా ఉందని, భవిష్యత్ తరాలకు మంచి పర్యావరణాన్ని అందించాలంటే ప్రతి ఒక్కరు విధిగా మొక్కలు నాటాలని కోరారు. ఇంత మంచి కార్యక్రమం చేపట్టిన ఎంపీ సంతోష్ కుమార్‌కి ధన్యవాదాలు అని అన్నారు. ప్రతి ఒక్కరూ ఈ కార్యక్రమంలో పాల్గొని మొక్కలు నాటాల్సిందిగా నటి మిర్నాళిని రవి కోరారు. ఈ కార్యక్రమంలో పాల్గొని మొక్కలు నాటడం సంతోషాన్నిచ్చిందని అన్నారు. అనంతరం ‘గ్రీన్ ఇండియా ఛాలెంజ్’ కో ఫౌండర్ రాఘవ వృక్షవేదం పుస్తకాన్ని ‘ఎనిమి’ చిత్ర బృందానికి అందజేశారు.