క్యాన్సర్‌తో పోరాడి గెలిచిన విజేతలు

మిర్చి, అత్తారింటికి దారేది వంటి సినిమాల్లో ఐటం సాంగ్స్‌లో నటించి టాలీవుడ్ ప్రేక్షకులకు దగ్గరైన నటి హంసా నందిని. తనకు ఇటీవల క్యాన్సర్ సోకిందని సోషల్ మీడియా వేదికగా ఆమె ప్రకటించింది. ఈ విషయాన్ని ఇన్‌స్టా వేదికగా ఆమె సోమవారం తెలిపింది. ప్రస్తుతం తను క్యాన్సర్‌తో పోరాటం చేస్తున్నానని  త్వరలోనే కోలుకుని తిరిగి వస్తానని ఆమె పేర్కొంది. గతంలో ఎంతోమంది సెలెబ్రిటీలు క్యాన్సర్‌తో పోరాడి తిరిగి కోలుకున్నారు. ఆ విధంగా క్యాన్స్‌ర్‌ను పోరాడి గెలిచిన వారిపై  ఓ లుక్కేద్దామా.. 

సోనాలి బింద్రే :

మన్మథుడు, ఇంద్ర వంటి సినిమాల్లో నటించి తెలుగు వారికి చేరువైన నటి సోనాలి బింద్రే . 2020, జులైలో ఆమె క్యాన్సర్ బారిన పడినట్టు  ప్రకటించింది. అనంతరం క్యాన్సర్‌తో పోరాడి గెలిచింది. ప్రస్తుతం ఆ వ్యాధితో బాధపడేవారికి  అండగా నిలబడుతుంది. 

అనురాగ్ బసు : 

మర్డర్, గ్యాంగ్ స్టర్, బర్ఫీ వంటి హిట్ చిత్రాలకు దర్శకత్వం వహించిన బాలీవుడ్ దర్శకుడు అనురాగ్ బసు. ఆయన బ్లడ్ క్యాన్సర్ (లుకేమియా) బారిన పడ్డారు. రక్తంలో తెల్లరక్త కణాలు విపరీతంగా పెరిగిపోవడంతో ఈ వ్యాధి వచ్చింది. ఆ వ్యాధితో పోరాడి ఆయన గెలిచారు. అనంతరం దర్శకుడిగా తన ప్రయాణాన్ని విజయవంతంగా కొనసాగిస్తున్నారు. 

లీసా రే : 

మోడల్, నటి అయిన లీసా రే‌  దశాబ్దం క్రితం క్యాన్సర్ బారిన పడింది. ప్లాస్మా సెల్‌లో ఏర్పాడే మల్టిఫుల్ మైలోమా అనే క్యాన్సర్ ఆమెకు సోకింది. దాదాపుగా ఏడాదికి పైగా ఆ వ్యాధికి చికిత్స తీసుకుంది. అనంతరం దానితో పోరాడి గెలిచింది. 

మనీషా కోయిరాలా : 

నేపాలీ నటిగా చిత్రాల్లోకి అడుగుపెట్టి తన నటనతో గుర్తింపు తెచ్చుకున్న నటి మనీషా కోయిరాలా. 2012లో ఓవరియన్ క్యాన్సర్‌తో పోరాడి ఆమె గెలిచింది. అనంతరం ఆ అనుభవాలను సోషల్‌మీడియా వేదికగా ఆమె తెలియజేస్తుంది. క్యాన్సర్ బాధితులకు భరోసా కల్పిస్తుంది. 

రాకేశ్ రోషన్: 

హృతిక్ రోషన్ తండ్రి రాకేశ్ రోషన్ గొంతు క్యాన్సర్ బారిన పడ్డారు. ఆ క్యాన్సర్ 2019, జనవరిలో ఆయనకు సోకింది. కొంతకాలం ఆ క్యాన్సర్‌కు చికిత్స తీసుకున్నారు. అనంతరం సర్జరీ చేయించుకుని ఆ వ్యాధితో పోరాడి గెలిచారు. నిర్మాతగా బాలీవుడ్‌లో తన ప్రయాణాన్ని అలుపెరగకుండా కొనసాగిస్తున్నారు. 

మమతా మోహన్‌దాస్ :

యమ దొంగ సినిమాలో తారక్ సరసన నటించి తెలుగు వారికి దగ్గరైన నటి మమతా మోహన్ దాస్. 2010లో ఆమెకు క్యాన్సర్ సోకింది. ఆ సంవత్సరమే ఫిల్మ్ ఫేర్ ఉత్తమ నటిగా ఆమె అవార్డు గెలుచుకుంది. కొన్ని ఏళ్ల పాటు క్యాన్సర్‌‌కు ఆమె  చికిత్స తీసుకుంది. అనంతరం సినిమా కెరీర్‌ను మరల 2015లో మొదలుపట్టింది.  

గౌతమి : 

తెలుగు, తమిళ, కన్నడ సినిమాల్లో నటించి అన్ని వర్గాల ప్రేక్షకులకు దగ్గరైన నటి గౌతమి. ఆమె బ్రెస్ట్ క్యాన్సర్ బారిన పడింది. ఆ సమయంలో ఆమె సినిమా కెరీర్ పీక్‌లో ఉంది. కొన్నా‌ళ్లు ఆ వ్యాధితో పోరాడి గెలిచింది. ప్రస్తుతం బ్రెస్ట్ క్యాన్సర్‌పై ఆమె అవగాహన కార్యక్రమాలు చేపడుతుంది. 

యువరాజ్ సింగ్ : 

6 బంతుల్లో 6 సిక్సులు కొట్టి చరిత్ర సృష్టించిన భారత క్రికెటర్ యువరాజ్ సింగ్ . ఆయనకు లంగ్ క్యాన్సర్ సోకింది. ఎడమ ఊపిరితిత్తిలో ట్యూమర్ ఉందని 2011లో బయటపడింది. ఆ వ్యాధితో పోరాడి ఆయన గెలిచారు.