‘డర్టీ హరి’.. దుమ్మురేపుతున్నాడట

కరోనా లాక్‌డౌన్‌తో ఇప్పుడు ఓటీటీ, ఏటీటీల హడావుడి మొదలైంది. వారానికో సినిమా ప్లాన్‌ చేస్తూ.. మధ్యలో వెబ్‌ సిరీస్‌లంటూ.. ఓటీటీలు ప్రేక్షకులను ఆకర్షించే ప్రయత్నం చేస్తున్నాయి. ఈ క్రమంలోనే సీనియర్ నిర్మాత, దర్శకుడు ఎమ్మెస్ రాజు తను దర్శకత్వం వహించిన 'డర్టీ హరి' సినిమాని ఫ్రైడే మూవీస్ అనే ఏటీటీ(ఎనీ టైమ్ థియేటర్) ద్వారా విడుదల చేశారు. ఈ చిత్రం డిసెంబర్ 18 సాయంత్రం 6 గంటలకు విడుదలైంది. రొమాంటిక్ సస్పెన్స్ డ్రామాగా తెరకెక్కిన ఈ చిత్రానికి ప్రేక్షకుల నుంచి అద్భుతమైన రెస్పాన్స్‌ వచ్చినట్లుగా చిత్రయూనిట్‌, అలాగే ఫ్రైడే మూవీస్‌ ఏటీటీ సంస్థ అధికారికంగా ప్రకటించింది.

శ్రవణ్ రెడ్డి, రుహానీ శర్మ, సిమ్రత్ కౌర్ ప్రధాన పాత్రల్లో వచ్చిన ఈ బోల్డ్ రొమాన్స్ డ్రామాకు పాజిటివ్ రెస్పాన్స్ వచ్చిందని... ఫ్రైడే మూవీస్ ఏటిటిలో విడుదలైన ఈ చిత్రం 24 గంటల్లో 91818 వ్యూస్ దక్కించుకుందని తెలుపుతూ అధికారికంగా చిత్రయూనిట్‌ ఓ పోస్టర్‌ను విడుదల చేసింది. ఇక ఈ ఏటీటీ ప్రత్యేకత ఏమిటంటే.. ఒక్క టికెట్ తీసుకుంటే ఎంతమంది ఎన్నిసార్లైనా 24 గంటల టైమ్‌లో సినిమాని చూడవచ్చట. సినిమాకు మంచి టాక్ రావడంతో వ్యూస్ మరింతగా పెరుగుతాయని నమ్మకంగా ఉన్నట్లుగా దర్శక నిర్మాతలు తెలుపుతున్నారు.