వావ్.. సుధీర్ బాబు.. ఏం చేస్తివి ఏం చేస్తివి

తరాలు ఎన్ని మారినా.. ‘దానవీరశూరకర్ణ’ చిత్రంలోని ‘ఏమంటివి ఏమంటివి’ డైలాగ్‌కు ఉన్న క్రేజ్ మాత్రం ఏనాటికి తగ్గదు. విశ్వవిఖ్యాత నటసార్వభౌమ స్వర్గీయ నందమూరి తారక రామారావు చెప్పిన ఈ పవర్‌ఫుల్ డైలాగ్.. రాబోయే తరాలు కూడా చెప్పుకుంటాయనడంతో అతిశయోక్తి ఉండదేమో. ఎన్ని తరాలైనా ఈ డైలాగ్‌ను ఆ ఎన్టీఆర్‌లా చెప్పడం ఎవరితరం కాదు. ఇప్పటికే ఎందరో ఈ డైలాగ్ చెప్పాలని ప్రయత్నించారు. ఆయన మనవడు యంగ్ టైగర్ ఎన్టీఆర్ కూడా ఈ డైలాగ్ చెబుతారు.. కానీ ఆయన రిథమ్‌లో మాత్రం చెప్పలేనని స్వయంగా ఎన్టీఆరే ఓ ఇంటర్వ్యూలో చెప్పారు. 

ఇప్పుడిదే డైలాగ్‌ను యంగ్ హీరో సుధీర్ బాబు చెప్పే ప్రయత్నం చేశారు. ఎన్టీఆర్ డైలాగ్ చెబుతున్న వీడియోని పక్కన పెట్టుకుని డబ్బింగ్ చెబుతున్నట్లుగా సుధీర్ ‌బాబు ఈ డైలాగ్‌ను చెప్పారు. లాక్‌డౌన్ కారణంగా ఇది ట్రై చేశా అంటూ.. సుధీర్ బాబు తను డైలాగ్ చెబుతున్న వీడియోని పోస్ట్ చేశారు. టైమింగ్‌లో చెప్పడానికి సుధీర్‌బాబు ప్రయత్నించారు కానీ.. ఆ పెద్దాయనని అనుకరించడం అంత సాధ్యం కాదని ఆయనకి కూడా తెలుసు. కానీ ఈ టైమ్‌లో ఇలాంటి ఆలోచన రావడమే చాలా గొప్ప విషయం అని సుధీర్‌బాబుపై నెటిజన్లు ప్రశంసల వర్షం కురిపిస్తున్నారు.