‘30 రోజుల్లో ప్రేమించటం ఎలా?’ సెన్సార్ టాక్

యాంకర్ ప్రదీప్ మాచిరాజు హీరోగా పరిచయమవుతున్న చిత్రం ‘30 రోజుల్లో ప్రేమించటం ఎలా?’. ఎస్వీ ప్రొడక్షన్స్ బ్యానర్‌పై ఎస్వీ బాబు నిర్మిస్తున్న ఈ చిత్రానికి మున్నా దర్శకుడు. అమృతా అయ్యర్ నాయిక. ఈ సినిమా సెన్సార్ కార్యక్రమాలు పూర్తయ్యాయి. సినిమా ఒక దృశ్యకావ్యంగా ఉందని సెన్సార్ సభ్యులు అభినందించినట్లు చిత్ర బృందం తెలిపింది.

ఈ చిత్రానికి సంబంధించి ఇటీవల సూపర్‌స్టార్ మహేష్ బాబు చేతుల మీదుగా విడుదలైన ‘నీలి నీలి ఆకాశం’ సంగీత ప్రపంచంలో ఒక సంచలనం సృష్టిస్తూ పెద్ద సక్సెస్ అయిన విషయం తెలిసిందే. యూట్యూబ్‌లో ఇప్పటికి 50 మిలియన్ వ్యూస్ ఆ పాట సాధించింది. ఒక చిన్న సినిమా పాట ఈ స్థాయిలో పాపులర్ కావడం మాములు విషయం కాదు. సంగీత ప్రియులు ఈ పాటను ఈ స్థాయిలో ఆదరిస్తున్నందుకు చాలా ఆనందంగా ఉందని నిర్మాత ఎస్వీ బాబు తెలిపారు. ఈ చిత్రంలో హీరో ప్రదీప్ రెండు షేడ్స్ ఉన్న క్యారెక్టర్‌లో నటించారు. హీరో హీరోయిన్ల మధ్య వచ్చే సన్నివేశాలు ఎమోషనల్‌గా ఉండి అలరిస్తాయని ఆయన పేర్కొన్నారు. 

అనూప్ రూబెన్స్ సంగీతం, చంద్రబోస్ సాహిత్యం, దాశరథి శివేంద్ర ఛాయాగ్రహణం ఈ సినిమా ప్రధాన ఆకర్షణ అవుతాయని, దర్శకునికి ఇది తొలి సినిమా అయినప్పటికీ ఒక దృశ్య కావ్యంలా చిత్రాన్ని రూపొందించారని, లవ్ ఎంటర్‌టైనర్‌గా సినిమా అలరిస్తుందని తెలిపిన ఆయన.. త్వరలోనే చిత్రాన్ని విడుదల చేయడానికి ఏర్పాట్లు చేస్తున్నట్లుగా చెప్పారు.