మరో సినిమా ప్రారంభించిన పవన్!

రాజకీయాలకు కాస్త బ్రేక్ ఇచ్చిన పవర్‌స్టార్ పవన్ కల్యాణ్ ప్రస్తుతం సినిమాలపై దృష్టి సారించారు. వరుస సినిమాలను లైన్లో పెడుతున్నారు. ప్రస్తుతం వేణు శ్రీరామ్ దర్శకత్వంలో దిల్ రాజు నిర్మిస్తున్న `వకీల్ సాబ్` సినిమాలో నటిస్తున్నారు. అలాగే క్రిష్ సినిమా షూటింగ్‌ను త్వరలో ప్రారంభించనున్నారు. తాజాగా మరో సినిమాను కూడా పట్టాలెక్కించారు. మలయాళ `అయ్యప్పనుమ్ కోషియమ్` సినిమా తెలుగు రీమేక్‌ను ప్రారంభించారు. 

ఈ సినిమాలో పవన్‌తోపాటు రానా కూడా నటిస్తున్నాడు. సాగర్.కె.చంద్ర రూపొందించనున్న ఈ చిత్రానికి తమన్ సంగీత దర్శకుడు. ఈ రోజు (సోమవారం) పూజా కార్యక్రమాలతో ఈ చిత్రాన్ని లాంఛనంగా ప్రారంభించారు. దేవుడి పటాలపై పవన్ క్లాప్ కొట్టారు. డైరెక్టర్ త్రివిక్రమ్ శ్రీనివాస్ కెమెరా స్విచ్ఛాన్ చేశారు. పీడీవీ ప్రసాద్ సమర్పణలో సూర్యదేవర నాగవంశీ ఈ చిత్రాన్ని నిర్మించనున్నారు. జనవరి నుంచి ఈ సినిమా రెగ్యులర్ షూటింగ్ ప్రారంభం కాబోతోంది.