బాలీవుడ్‌పై విమర్శలు.. హేమా మాలిని స్పందన!

కాస్టింగ్ కౌచ్, బంధుప్రీతి, డ్రగ్స్ వాడకం.. బాలీవుడ్‌లోని చీకటి కోణాలపై దేశవ్యాప్తంగా విమర్శలు వెల్లువెత్తుతున్నాయి. సామాన్యుల నుంచి రాజకీయ ప్రముఖుల వరకు అందరూ బాలీవుడ్‌పై విమర్శలు గుప్పిస్తున్నారు. ఈ వేడి తాజాగా పార్లమెంట్‌నూ తాకింది. బీజేపీ ఎంపీ రవికిషన్ బాలీవుడ్‌పై విమర్శలు చేసిన సంగతి తెలిసిందే. ఈ విమర్శలకు రాజ్యసభలో జయాబచ్చన్ కౌంటర్ ఇచ్చారు. ఎవరో కొందరు చేసిన తప్పులకు బాలీవుడ్ మొత్తాన్నీ నిందించడం సరికాదని ఆమె హితువు పలికారు. 

జయాబచ్చన్‌కు తాజాగా బీజేపీ నాయకురాలు హేమా మాలిని మద్దతుగా నిలిచారు. `బాలీవుడ్ నాకు పేరు, డబ్బు, గౌరవం.. అన్నీ ఇచ్చింది. తల్లి లాంటి పరిశ్రమపై విమర్శలు వింటుంటే చాలా బాధగా ఉంది. బాలీవుడ్ చాలా అందమైనది. ఓ సృజనాత్మక ప్రపంచం. డ్రగ్స్, బంధుప్రీతి వంటి కారణాలు చూపించి అందరూ బాలీవుడ్‌ను విమర్శస్తుంటే చాలా బాధగా ఉంది. చెడు ఎక్కడ ఉండదు? ఎంతో మంది దిగ్గజాలను బాలీవుడ్ ఈ ప్రపంచానికి అందించింది. రాజ్‌కపూర్, దేవ్ ఆనంద్, ధర్మేంద్ర, అమితాబ్ బచ్చన్.. వీరందరినీ ప్రజలు దేవుళ్లుగా భావించారు. బాలీవుడ్ అంటే భారత్` అని హేమా మాలిని పేర్కొన్నారు.