రవితేజ ‘ఖిలాడి’కి.. ‘కెజియఫ్‌’ టచ్‌

మాస్ మ‌హారాజా ర‌వితేజ సినిమాకి ‘కెజియఫ్‌’ టచ్‌ ఇస్తున్నారు. ఆయన హీరోగా ర‌మేష్ వ‌ర్మ డైరెక్ష‌న్‌లో రూపొందుతోన్న యాక్ష‌న్ ఎంట‌ర్‌టైన‌ర్ చిత్రం 'ఖిలాడి'. స‌త్య‌నారాయ‌ణ కోనేరు నిర్మిస్తున్న ఈ చిత్రం ఇటీవల ప్రారంభమైన విషయం తెలిసిందే. ర‌వితేజ డ‌బుల్ రోల్ చేస్తున్న ఈ సినిమాని ఏ స్టూడియోస్‌తో క‌లిసి బాలీవుడ్ నిర్మాణ సంస్థ పెన్ స్టూడియోస్ నిర్మిస్తోంది. జ‌యంతీలాల్ గ‌డ ఈ చిత్రాన్ని స‌మ‌ర్పిస్తున్నారు. 'ప్లే స్మార్ట్' అనేది ఈ సినిమా ట్యాగ్‌లైన్‌. హ‌వీష్ ప్రొడ‌క్ష‌న్‌లో రూపుదిద్దుకుంటున్న ఈ హై యాక్ష‌న్‌ మూవీకి పాపుల‌ర్ ఫైట్ మాస్ట‌ర్లు రామ్‌-ల‌క్ష్మ‌ణ్ ఫైట్స్‌ను కంపోజ్ చేస్తున్నారు. వీరితో పాటు మ‌రో స్టంట్ మాస్ట‌ర్ల జోడీ కూడా ఈ సినిమాకు పనిచేస్తుంది.

'కేజీఎఫ్‌', 'ఖైదీ' లాంటి యాక్ష‌న్ థ్రిల్ల‌ర్స్‌కు హై ఓల్టేజ్ యాక్ష‌న్‌ సీక్వెన్స్ అందించిన అన్బు-అరివు ఈ సినిమాకు పనిచేస్తున్నారు. తాజాగా వీరిద్దరు టెక్నీషియ‌న్ల బృందంలో జాయిన్ అయ్యారు. వీరు రవితేజ 'ఖిలాడి'కి ఒళ్లు గ‌గుర్పాటు క‌లిగించే కొన్ని యాక్ష‌న్ సీన్ల‌ను డిజైన్ చేస్తున్నట్లుగా చిత్రయూనిట్‌ ప్రకటించింది. సౌత్ ఇండ‌స్ట్రీలోని న‌లుగురు టాప్ ఫైట్ మాస్ట‌ర్లు ప‌నిచేస్తుండ‌టంతో యాక్ష‌న్ ల‌వ‌ర్స్‌కు ఈ మూవీ మంచి ట్రీట్ కానుందని చెప్పుకోవచ్చు. హైద‌రాబాద్‌లో నిర్మించిన ఓ భారీ జైలు సెట్‌లో ప్ర‌స్తుతం కొన్ని ప్ర‌ధాన‌మైన స‌న్నివేశాలు చిత్రీక‌రిస్తున్నారు. ఈ స‌న్నివేశాల్లో ర‌వితేజ పాల్గొంటున్నారు. కీల‌క‌మైన ఈ జైలు ఎపిసోడ్స్‌, ప్ర‌త్యేకించి అన్బు-అరివు ఆధ్వ‌ర్యంలో తీస్తున్న యాక్ష‌న్ ఎపిసోడ్స్.. 'ఖిలాడి'కి బిగ్గెస్ట్ ఎట్రాక్ష‌న్ కానున్నాయని చిత్రయూనిట్‌ తెలుపుతోంది. ర‌వితేజ స‌ర‌స‌న మీనాక్షి చౌదరి మెయిన్ హీరోయిన్‌గా న‌టిస్తుండ‌గా, డింపుల్ హ‌య‌తి సెకండ్ హీరోయిన్‌గా నటిస్తోంది. రాక్‌స్టార్‌ దేవిశ్రీ ప్రసాద్‌ సంగీతం అందిస్తున్నారు.